Likama lioko ya nzela lisalemaki mokolo mwa mibale ya mposo oyo (mardi 29/05), na nzela ebengami « Route nationale numéro 2 (RN2) », na etando ya Kabare o etuka ya Sud-Kivu.
Bayi pulusu bwa Congo (PNC) balimboli été motuka moko ya monene ya mapinga mwa FARDC nde ekweyaki na esika moko ebengami Efo-perso, yango ezwami na Miti-Murhesa o etando ya Kabare.
Kolanda maloba mwa commandant ya PNC ya lac Kivu, commissaire Joseph Kalyandamwali oyo asololaki na bapanzi nsango bwa ACP ; likama lia motuka wana ya FARDC ebomi bato babale (2) mpe ezokisi basusu koleka zomi (+10).
Bayi PNC balimboli lisusu ete lapolo oyo ezali ya mwa ntango moke (bilan provisoire). Na sima ya bolukiluki, tango mosusu bato basusu baye bazokaki to mpe bakufaki bakoki komonana.
