Etando ya Kinyaongo oyo ezwami na groupement Bapfuna, secteur Osso Banyungu na territoire ya Masisi, ezongi na maboko ma mampinga FARDC oyo esungami na babundi ya Wazalendo, uta lundi eleki, nsima na bitumba makasi na batomboki ya AFC/M23.
Engebene na maziba ya mboka lelo, baye babundaki bakangaki mboka yango kaka na ntongo wana yambo na kolongolama na bisika bia bango. Mampinga ma ekolo ebateli sikoyo bisika na yango kuna, nzokande batomboki bazongi sima na Kinyumba, pene na Nyabiondo, na nzela ya Pinga.
Bokangami lisusu ya Kinyaongo epesi nzela na bofungoli lisusu mobembo kati na Nyabiondo na Pinga, oyo etelemisamaki mwa ngonga yambo mpo na bitumba biye.
Bafandi mingi, oyo bakimaki na bamboka ya zingazinga to na zamba, babandi kozonga na ndako. Bato basusu oyo balongolami na bandako na bango bakimi na etuluku ya Ihana, na territoire ya Walikale, nzokande basusu batikali naino na bisika bia bango ya kobombana.
